448 денари за маска, а за скафандер и до 1.788 денари плаќале институциите?!
Вкупно 6,7 милиони евра чинат договорите за итни јавни набавки на државните институциите за заштита од коронавирусот склучени во првите шест месеци од кризата. За 68 отсто од склучените договори институциите ја прекршиле законската обврска да ги објават договорите во рок од десет дена од потпишувањето. Дури една третина тендерите ги распишало Министерството за внатрешни работи.
Ова го констатира Центарот за граѓански комуникации во сумарниот извештај од мониторингот на јавните набавки поврзани со ковид-19 во првите шест месеци од кризата.
Според наодите на Центарот, 97 државни институции имале итни јавни набавки при што потпишале 447 договори кои тежеле 6,7 милиони евра..
Дури 2,2 милиони евра чинеле 13 јавни набавки на Министерство за внатрешни работи кое е на врвот по износот на склучените договори.
| Бр. | Институција | Број на договори | Вкупна вредност во евра |
| 1 | Министерство за внатрешни работи | 13 | 2.167.253 |
| 2 | Министерство за здравство | 22 | 733.020 |
| 3 | Универзитетска клиника за трауматологија | 48 | 699.914 |
| 4 | Градска општа болница „8 Септември“ Скопје | 35 | 429.172 |
| 5 | Македонската академија на науките и уметностите -МАНУ | 24 | 259.127 |
Договори за набавки со државните институции потпишале 186 компании, но 43 отсто од вредноста на сите тендери добиле пет фирми.
„Гифти текс“ за два договора добила 1,1 милион евра, додека „Алкалоид“ за 18 договори добила 299.862 евра.
